Codex Alimentarius
Codex Alimentarius er ei samling av standardar, rettleiingar og «best praksis» (omtalt som standardar) vedtatt av Codex Alimentarius Commission (CAC).
Codex Alimentarius Commission (CAC) er oppretta av FAO og WHO for å verne helsa til forbrukarane og fremje rettferdig praksis for handel med mat.
Tilvisinga til Codex standardar i WTOs avtale om sanitære og fytosanitære tiltak (SPS-avtalen) betyr at standardane er grunnleggande for å legge til rette for global handel med trygg mat.
Codex' standardar har som mål å sikre forbrukaren eit trygt, sunt produkt utan forfalsking, korrekt merka og presentert. Codex Alimentarius inkluderer standardar for alle dei viktigaste matvarene, enten dei er foredla, halvforedla eller rå. I tillegg blir det gitt føresegner med omsyn til mathygiene, mattilsetningsstoff, restar av plantevernmiddel og veterinærmedisinar, forureiningar, merking og presentasjon, metodar for analyse og prøvetaking, og dessutan rettleiingar for import og eksport-system.
CAC har i dag 188 medlemsland og 1 medlemsorganisasjon (EU) og 243 observatør-organisasjonar. Noreg har vore aktiv medlem sidan skipinga, og det er Mattilsynet som er kontaktpunkt, koordinerer arbeidet og leier delegasjonane.
Les meir om formålet med arbeidet og kvifor vi deltar i Codex
Codex Alimentarius og norsk regelverk
Codex Alimentarius er ikkje ei erstatning for, eller alternativ til, nasjonal lovgiving, men tilvisinga til Codex standardane i SPS-avtalen (wto.org) gjer at standardane fungerer som internasjonal referanse. Dette betyr at dei medlemsstatane som vel å legge Codex standardane til grunn for den nasjonale lovgivinga si, automatisk oppfyller kravet om sakleg vitskapleg grunngiving. Det er derfor viktig at vi deltar for å vareta norske interesser.
Arbeidet i Codex er drive av medlemmene, det er ope, inkluderande og bygde på konsensus. Dette betyr i praksis at alt ligg lett tilgjengeleg på nettsida; møtedagsordenar og -dokument blir lagde ut fortløpande og kan lesast av alle. Alle standardar og relaterte tekstar er også tilgjengelege.
- Codex' standardar: Standards (fao.org) og relaterte tekstar: Codex Texts (fao.org)
- Codex' rettleiingar: Guidelines (fao.org)
- Codex' beste praksis: *Codes of Practice (fao.org)
Kvifor deltar vi?
Noreg som medlem av WHO, FAO og WTO har ei plikt til å delta i internasjonalt arbeid med å harmonisere regelverk på matområdet.
Noreg må som andre land bidra til at det blir lagt til rette for internasjonal omsetning av trygge matvarer. Dette gjer vi ved å forhandle fram harmoniserte føresegner, der vi og får høve til å vareta vårt eige regelverks prinsipp og verdiar. På enkelte område er det diametrale forskjellar mellom regionane når det gjeld nasjonal regulering. Vi må bidra til at standardar og rettleiingar ikkje går i feil retning. Det er spesielt viktig for berekraft og «det grøne skiftet» i delar av Europa.
Vi har ein stor eksport og er tente med føreseielege rammer og harmonisert regelverk. Vi bidrar med kunnskap på område som vi er spesielt opptatte av, som fiskeområdet. Regelverket vårt skal ikkje vere i strid med Codex`standardar, derfor må vi delta aktivt og påverke.
Kva bruker vi arbeidet til?
Arbeidet med standardar og relaterte tekstar gir Mattilsynet viktig informasjon som kan påverke nasjonalt regelverksarbeid og EU-arbeidet. Deltaking i diskusjonane er viktige fordi vi får kjennskap til underliggande motiv for synspunkt som ikkje kjem fram i dei offisielle rapportane, men som vi kan støyte på i arbeidet med marknadstilgang.
Mattilsynet får auka kunnskap om andre lands næringsmiddellovgiving og utviklinga innan næringsmiddelteknologi. Vi får også betre forståing for normer og standardar som blir fastsette, som vi igjen kan bruke i rettleiingsmateriellet vårt.
Rapportering frå Codex Alimentarius Commission (CAC)
CAC er Codex' øvste organ og behandlar og godkjenner nytt arbeid og alle standardar frå underliggande komitear, til saman 10 generelle og 4 aktive varestandardkomitear. Kommisjonen møtest ein gong i året, vekselvis mellom Genève og Roma, der WHO og FAO har hovudseta sine. Noreg er alltid med på desse møta.
Prioriteringar for arbeidet i Codex Alimentarius
Mattilsynet gjennomfører årleg ein gjennomgang av Noregs aktivitet i Codex Alimentarius for å prioritere arbeidet i det kommande året. Prioriteringane blir tatte på bakgrunn av Matdepartementenes generelle føringar, igangverande regelverksarbeid, og Mattilsynets faglege vurderingar.
Formøte
Mattilsynet inviterer kunnskapsinstitusjonar, næring og interessentar til formøte til alle Codex' sesjonar vi er med på. På desse formøta deltar også HOD, LMD og NFD. Vi deler dagsorden og dokument frå Codex' nettside, og vi tar gjerne imot innspel på aktuelle saker.
På formøta gir vi informasjon om kva sakene dreier seg om, kva betyding dei kan ha for Noreg og vi tar imot innspel. I tillegg til informasjon frå Mattilsynet, blir det oppdatert løpande informasjon om alle sesjonar på nettsida til Codex (fao.org).